Pensioen

Dao is alwiel völ diskussie euver de pensioenlaeftiêd. De regering rolleboltj d’r al lang euver inne Kamer. Wietj d’r noê nao oetzuut zulle wae dangerdaag allemaol minimaal mòtte wirke tot oos 80e  (aster teminste nog werk is).
Mer dao zaltj neet bie bliêve. Het weurtj nog völ en völ erger. Want wae gaon langer laeve. Ich heb zelfs gelaeze det ’t biologies meugelik is det minse inne toekomst 140 jaor of aojer waere. Wat ein veuroetzicht!

Pensioen zal blieve. Mer dan mòtte d’r waal ein paar noe wètte op losgelaote waere. En det zal nog hieël get veut in d’aerd hebbe!
Bie deze ein aantal euverweginge mèt get snuffe fantazie!

 

– Pak hum beet, op oos 80e beginne wae veur ’t ieërst van Drees te trèkke.(Drees??? Weem waas det ouch al weer?)

– Nao 30 jaor van die oetkieëring genote te hebbe en kinjer, kleinkinjer en achterkleinkinjer geholpe te hebbe mèt klusse en oppasse sleit de leegdje toe. De verbouwinge van douches en keukes beginne nao 7 kieër de kael oet te hange, de patstèlling mèt de bure zal noeët opgelostj waere en alle fietscafés in eine òmtrèk van 50 kilomaeter zeen mèt de batteriefiets al tig kieër bezòchtj. Men raaktj stilaan ouch oetgekeke oppe partner en dao beginne get klein pienkes de kop op te staeke.
Mèt anger weurd, de midlife-crisis sleit veur de 2e kieër toe, mer dan de bejaordje-midlife-crisis.

– Dees minse zulle verplichtj gaon waere òm (weer) ein baantje te zeuke. Det hooftj neet drek full-time, mer ein duo-baan is daoveur boetegewoeën gesjiktj. Laot twieë bejaordje same éin functie oetoefene en de hebst ein ervaring van bekans 300 jaor binnegehaaldj! Welke wirkgaever wiltj det neet? Dan kan toch niks mieër mis gaon?!

– Plogedeenst is ouch meugelik want minse van dae laeftiêd hebbe d’r gein mote mèt òm euverdaag in plaats van snachs te slaope/wirke

– Wat veur werk bie dees lichting pèstj?
Meugelikhede zat! Ich neum: Bejaordje-plus-verzörger, verkuiper van huuërtoestèlle van eine mm², adviseur van anti-doorlik-matrasse, parkeerwachter of veurpreuver in ein bedriêf woeë ze belaege kieës make. Zölke beroepe zeen tot op hoeëge laeftiêd vaôl te haoje. Boete det snietj ’t mes aan twieë kantje: De bejaordje blieve langer fit, ’t is good veur de economie en veur de pensioenpot dae tege dae tiêd gevaorlik leeg dreigtj te rake.

Al dees gedachtekroonkels zitte nateurlik inne theorie-fase en mòtte hiê en dao nog get biêgesjaafdj waere. Mer regere is vroetkieke!

Minse die dees planne waal zeen zitte kònne zich opgaeve bie ein noe op te richte pertie: De pertie “veur euver 80 jaor”.

LeiS