Het is ein gek dink! Zoeë gauw aster bie de klei-jerwinkels de vètte posters mèt “SALE” (oetgesproke as “seel”) veur de etalage-roête hange òntwaaktj bie bie mien vrouw ein sluimerendj virus. De kònse neet wègdoewe of negere. Det ister gewoeën! Dao zeen trouwes genògt minse in ‘t Wieërter landj die “SALE” oetspraeke as “SALEE”
SALE beteikentj simpelwèg “oetverkoûp”. ’t Heet sjienbaar nog mieër aantrèkkingskracht as det in ’t Ingels weurtj aangekondigdj. Sòms waere d’r nog anger groeëte pepere biê gehange woeë-op steit wievöl procent korting d’r waal neet gegaeve weurtj, variërendj van 10% tot waal 50%! Det wirktj bie ’t opkomendj virus nog ins wie eine roeëje lap op eine stier. Dao’s neet tege te vechte. Dao mòt!!! nao de stad gegange waere. Klei-jer vandoon of neet.
Ich heb mich dao lang tege verzatte. Mer noeëts kònne winne. Tot ich ein van dees daag thoês kwaam en merkdje det ein gooj vriendin van mien vrouw op bezeuk waas. Ze haje mich allebei neet huuëre binnekome. Ich vòng get flarde van ’t gesprek op en spitsdje mien oeëre. Ze haje ‘t euver de oetverkoûp. Die vriendin verkondigdje det ze veurtaan heure mins netjes thoês leet as ze ging shoppe. “Want, as ’t SALE-tiêd is is ’t neet de bedoeling det mânleef inne weeg steit.”
Det kloônk wie muziek! “Die men staon dao altiêd wie eine zaotzak te kieke”, kwetterdje de vriendin. Dae van mich is al oeët op ein bênkske in slaop gevalle!”. “Wòrròm zootse zoeë emes nog mètpakke? Asse hum vreugst ofter dit ein sjoeën klèdje vintj heter neuge vanne tieën kieër niks te zègge. De lèste kieër waas hieëlemaol ’t toppeuntj! Ich vroog hum: Vinse dit bloeske sjoeëner dan wat ich net aan haaj? Wètse watter zagt? Wat veur ein haatse net aan dan….?!”
Det waas nog neet ‘t inj van de klaag-litanie en madam ging wiejer: “En ze wete ouch noeët niks te vinje, die men. Staon ich dao in ein pashok, bliêktj det de rok te ing is. Ich reik hum tôsse de gerdiêne door de rok aan aan en zèk: Gânk ins kieke ofse deze ouch nog in ein maot groeëter hebbe. Hieëremins! Blieftj ieërst ein ieëwigheid oet, keumtj eindelik aanslòffe en zeet dan druuëg: Woeë hebse dae rok gepaktj?? Dao zootse toch get van kriêge!! Mòt ich mich weer hieëlemaol aantoemele òm zélf te gaon zeuke!”
Ich haaj mien vrouwal dae tiêd neet gehuuërdj. Toen kwaam ze mèt ein verrassendje opmerking. “Miene mins geit eders kieër mèt mich mèt. Neet òmdetter verstandj van klei-jer heet, mer waal òmdet hae de auto altiêd waal örges kwiêt kan waere. Ich kan in die smaal parkeergarages neet ònger de veut oet, mer hae is dao eine kei in”.
LeiS
