Date

Date (spraek oet: deete) is ein meneer òm beveurbieëldj via de computer of tillefoon eine persoeën op te snorre woeëse waal ins get mieër euver wilst wete.

Nao get op-en-nieër gemail vinje de ieërste kontakte dèk plaats in ein (speciaal) restaurantje of in ein bar/pub. Zoeëget is nateurlik erg spannendj. Wie zuût dae persoeën d’r oet?  Ister besjei-je? Duiter ane lèste moeëde mèt?

Sòms kliktj ‘t waal en keumtj d’r ein vervolg op. Mer ‘t kan ouch zeên det ‘t niks weurtj. ’t Bliêktj eine aanstèller te zeên, hae heet zien negel neet zûver gemaaktj of hae huuërtj zichzelf té gaer kalle. ’t Is ouch meugelik det de interesses te wiêt oetrein ligge en dan liktj de relatie vreug of laât toch op zien gaât.

Eine stap wiejer keumse oet bie de term: “A one-night-stand”. Det beteikentj desse mèt eme daese pas kinst of veur de ieërste kieër zuûst al drek eine nacht de koffer in duikst.

Kan vrieët interessant zeen! Meistâl blieftj ’t bie eine kieër en twieë daag later probeertj men alweer aan emes anges te rûke.

Dergelikke gebeurtenisse staon nateurlik in sjril kontrast mèt de aktiviteite die opa en oma d’r indertiêd op nao hele.

Dao zeen veurbieëldje bekindj van verkieëringe (neum ’t vriejerstiêd) die mieër dan 10 jaor hebbe gedoordj veurdet de bleumkes en de biekes òmme hook kwome kieke en dan nóg kost ’t oet rake.

Mer ouch in dae tiêd woort nateurlik al ”gedeetj” mer det beperkdje zich tot stiekeme aafspräökskes achter de kirk, oppe sjelft of inne koestâl. Ouch plekke woeë buim en struûk de inkiêk tegehele wore in trèk. De kontakte woorte nateurlik neet gelagdj via eine computer, mer via femilie, kinnisse, bure of breefkes.

Bie ein ieërste aafspräökske in dae tiêd woort neet drek gekeke wie emes d’r oet zaag of  watter aan haaj. Òmdet in dae tiêd bekans ederein boôr waâs woort ieërst gepolstj wie de situatie op agrarisch gebied waâs. Istj ein keuterbeurke of eine vètte boôr? Wievöl groôndj ister te bewirke? Wie groeët is de vieëstapel. Kortom, dao woort drek gevèstj ofter (financiële) toekomst zaât in ein eventueel relatie.

Ein anger groeët versjil mèt ’t gedeet van alwiel is det aafstandj d’r neet mieër toe duit. Mèt emes oet Groningen is net zoeë snel eine deet gemaaktj as mèt emes oet Mestreecht.

In opa’s tiêd mosse de sjoorstein kinne zeen rouke. Mèt anger weurd, de toekomstige partner mocht neet âl te wiêt weg woeëne.

Wat de sjriêver van dit stökske betreftj: Dae kost de sjoorstein van zien leef neet zeen rouke  mer mèt ein half oor haard doorfietse waas hae eder weekend weer inne zevendje hemel.