De Zevendje Hemel

Het is ein völ gebroêkdje oetdrökking: Inne zevendje hemel zeên! Eme dae inne zevendje hemel is heet niks te klage. Hae veultj zich lekker, is blie en en is veur ein puuëske knoer-gelökkig. Ich gun ederein detter dao ins aan maag rûke.

Ich bin ein paar kieër inne 7e hemel gewaestj, mer neet zoeëlang.  Die kieëre kònse oppe vingers van éin handj tèlle! Ein van die spaarzaam momente waas toen ich veur de ieërste kieër miên ieërste maegdje achterop de fiets heivers mocht bringe.

Mer…aster eine zevendje hemel is dan mòtte d’r ouch nog 6 anger zeên. Toch?

 

Of die ònger de zevendje hemel ligge, of d’r achter, d’r bove of d’r naeve, des neet dudelik. En as de 7e het hoeëgst haalbare is, welke kwaliteite hebbe die anger 6 dan? Heet nummerke 6 get mieër te beje dan nummer 5? En 5 iets mieër dan 4 en zoeë ’t trepke aaf? En as nao diene doeëd de hoeëger machte hebbe beslote desse in hemel 1 oppe plek bèst diese verdeendj hebst…istj dao nog aevegood prettig vertoeve? Ich dink euver dergelikke gevalle waal ins dèkker nao. En heb in miên enthousiasme de volgendje plaetjes d’r biê geplektj:

Hemel 1:  Liêktj nog ein bitje op ’t waereldsj bestaon, allein kinse dao gein pien mieër veule en is bie good gedraâg de euverstap nao Hemel 2 nog meugelik. Van alle 7 hemele is ’t hiê ’t drökste.

Hemel 2: ’t Versjil mèt Hemel 1 zitj ‘m veural inne entoerage, ’t prettig klimaat en de aanwezigheid van tòngstrelendje Trappiste

Hemel 3: Vanaaf hiê is veural ’t aete dudelik baeter en mèt mieër zörg klaorgemaaktj. De bedening  kan op ein dikke 8 raekene net wie de harmonieuze harpmuziek.

Hemel 4: De lekkerigheid van aete  en drinke blieftj stijge en de meneer woeë-op de taofels  gedèktj zeen keumtj inne buurt van hoeëgere hotel-kwaliteit. Gouwe bestek is standaard.

Hemel 5: Noê beginne zich dudelik de écht fieëstelikke  taferele aaf te speule; bekans alles wasse  probeerst löktj in éine kieër, tegeslaag besteit neet mieër. Òm dich haer driêve allein nog mer roze wolke. De keus mèt weem desse dao op wils zitte is eindeloos.

Hemel 6: In dit hemelklimaat kinse veur alles ein dikke 10 gaeve. Ein klein naodeil zitj d’r nog aan: Hiê mòsse minimaal ein klein 100 jaor vertoeve òm dich hieëlemaol, totaal en kompleet in te laeve in de lèste stap nao:

Hemel 7: DE ZEVENDJE HEMEL!! Hiê geit ’t dus òm, ’t ultieme! Laeve in eine ieëwige droûm; aan niks tekort, alles in aevewicht, grenzeloos geniete, weldadige en altiêd-dorendje röst ane kop. De zaligheid ten top. Mer waal oersaai!