Kerstkaarte-meug

Proont wie òntèlbaar anger minse hebbe wae zoeë roondj half december aan femilie, vrinj en bekindje kerstkaarte gesteurdj. Kaarte mèt oppe veurkantj dennetekskes mèt snieë, klökskes, wintjerlandsjappe mèt rendiere, glaas-in-loeëdrame en gouwe lètters.

Oppe achterkantj stòng (handjgesjreve) de wins det Kerst en Noe plezerig moge verloupe en det ’t ’t jaor det d’r aan stòng te kome völ goods maag bringe. Zoeëget wie “Zalig Noejaor” dus, al kònne wae neet good ònger weurd bringe wat “zalig” eigelik beteikentj.
Inne dressoir stòng ein euverbekindje sjoondoeës woeë-in eine liêst laag mèt adresse van ederein dae in oos ouge zeker ein kaart most kriêge.
Eine alikke aovendj oettrèkke òm zoeë sjoeën meugelik de winse op pepeêr te zette, de adresse oet te zeuke en postzegels te plekke. Det is völ jaor zoeë gegange!
Mer noê zeen wae aan ’t twiêfele geslage of det steure van Kerst / Noejaors- kaarte nog waal zin heet. Laote wae det òmsjriêve as “Kerstkaarte-meug”.
Want stilaan blieftj de handjgesjreve tekst (dae nog get persuuënliks haaj) achterwege en daoveur inne plaats zeen d’r kaarte gekome woeë-op de hertelikke winse al veurgedröktj staon. Wèg persuuënlik!
Boete det beginne wae os aaf te vraoge of wae de femilie / bekindje / vrinj die os GEIN kaart steure (en dus waarsjienlik mèt ‘tzelfdje dilemma zitte) aevegood per post get dao mòtte doon, of det wae de ieër aan oszelf mòtte haoje. Dao keumtj nog biê detter links en rechs get minse aafvalle òmdet ze gestorve zeen en de liêst stilaan kleiner weurtj.
En tenslotte heet internet allang zien intraej gedaon en kinse knap mèt éine doew oppe knòp en binne 2 sekonde dien winse elektronies euverbringe. Sjiltj völ sjriêfwerk en ’t bespaart eine hieële houp aan portokoste.