Wie de wichter nog klein wore kreeg ich eder jaor mèt vaderdaag ein teikening mèt ein versje. ’t Kedootje waas sjoeën ingepaktj mèt ein strikske d’r òmhaer. Thoês woort het op ein geheim plaats verstoptj en op zònnigmörge kwome de snoternaze de slaopkamer ingestormdj en verrasdje mich mèt het kedootje . De versjes wore allemaol van ’t volgendje kaliber:
Liefste papa
Dag lieve papa, luister even.
Ik wil je een cadeautje geven.
Eerst wil ik zeggen tegen jou
dat ik zoveel van je hou.
Dat het wel elke dag
vaderdag zijn mag.
Nu geef ik je vlug een zoen
en kun je het pakje opendoen.
Noê de jeugd opgesjote is weurtj vaderdaâg nog steeds geveerdj mer wat kedo’s betreftj ister toch dein en danger verangerdj. Bie deze ein euverzicht van wat ‘moderne’ vaders tegewoordig allemaol aangeboje kriege. Mèt wat veurbieëldje van kinnisse en femilie.
Òm te beginne is ein ballonvaart van ein oor bove eige woeënplaats erg in. Neet goodkoup, mer dan hebse waal get. Eine middig karte à la Jos Verstappe is ouch ein tamelik actieve bezigheid. En in het verlingdje daovan is eine slipcursus nog actiever en keumtj waarsjienlik ouch nog waal ins van pas.
Wat miene buurman aangereiktj kreeg maag d’r ouch waal zeen: Òngerhalf oor inne sauna, gevolgdj door ein bodymassage. Mien broor kreeg ein T-shirt woeë-op ein groeëte foto van ziene eige kop geprintj waas. Ich zooj tink neet aan doon; hoeëg-oet ònger miene euveral.
Ein noe horloge, wat vreuger het summum van ein vaderdaagkedo waas, keumtj weinig mieër veur. Wichter die d’r zich gemèkkelik vanaaf wille make gaeve eine slieps, ein paar zök of ein fleske aftershave. En hieëlemaol oet zeen manchetknuip, hoewaal….
Zjaak haaj van zien zone veurig jaor ein hotelbòn gekrege. Mèt de achterliggendje gedachte det zien vrouw dan waal mèt zooj gaon; dan haje zu ’t riêk ein paar daag allein…
Pjaer zien dochter vònj det heur vader mer ins anger òngerbòkse most kriege. Die hae haaj hònge volges heur veur sjanj ane waslien. Òngerbòks is trouwes as woord ouch lieëlik aojerwets. Het mòt boxershort zeen. Iets minder revolutionair mer waal erg smakelik is eine maeter beer. Ein stök of 10 fleskes mèt allemaol versjillendje smake.
Tenslotte nog ein paar weggaevers die subtiel en plaogerig inspeule op eventuele veurvalle inne toekomst.
- Ein tube secondeliêm, veur as pap weer ins ein stök serviês oete henj lieëtj valle.
- Eine kortings-cheque van 50 euro op de modernste rollator.
- En tenslotte ein tegoodbòn van 60 euro veur aster weer ein envelop inne bös vèltj van het CJIB.
LeiS