DRUUËGE WIÊN

Wae zatte os mèt z’n vere aan ein täöfelke naodet wae nao ein lang zònnigmiddigwanjeling smachtendj eine herberg binnestapdje. De ober waas drek bie os. Hae keek ’t ieërst nao mich. Waarsjienlik òmdetter vermoedje det ich de portemonnee haaj en dan hebse altiêd ein streepke veur. ‘Eine Trappist van ’t vaât gaer!’ Mien vrouw bestèldje eine witte wiên.  ‘Zeut of druuëg?’ vroog de obert. ‘Zeut!’ zagt ze mèt euvertugendje stum, asof ‘druuëg’ neet te knauze is. De anger twieë taofelgenote droonke respectievelik eine spa blauw en eine roeëje wiên. Hee! Kee, noê vroog de bedener neet of dae roeëje wiên druuëg of zeut most zeên.

Vreemdj! Dus witte wiên kan of druuëg of zeut zeên mer bie roeëje kan det neet! Toen de ober de bestèlling bracht lagt ich hum mien vraog veur. Hae wist ‘t antjwoord neet. Ich kost hum det neet kwaolik neme want ’t waas eine jònge, goodwillendje week-end wirker dae nog völ ervaring misdje.

Mer toês most ich dao toch effe wiejer euver steggele. Kiek, iets kan klein of groeët zeen, zwart of wit, breid of smaâl,  sjoeën of lieëlik. En asse ein keus mòst make tösse 2 meugelikhede dan mòtte die twieë waal get met deindanger te make hebbe.  Bie de snackbar kinse vraoge òm ein frietje mèt of eine frietje sònger, ein frikandel speciaal of ein gewoeën frikandel, eine inkele of eine döbbele hamburger. ’t Kan neet zoeë zeên det de ober in ein restaurant dich vreugtj: ‘En wie wiltj gae de biefstök menieër, good doorbakke  of mèt eine slieps òm?’

In ’t bovestaondj ‘wiênveurbieëldj’ waere 2 dinger vergeleke die niks mèt deindanger te make hebbe. Druuëg en zeut zeen totaal versjillendje begrippe. De zootst de keus mòtte hebbe tösse zeute of zore wiên of tösse druuëge en nate wiên. Det lèste klinktj nateurlik volkome belachelik en mien hoêsgenote weze mèt de wiêsvinger nao heure kop bie dees redenering (is dae effe gek!) Mer ‘t kloptj wáál!!

Ich gaon ’t de volgendje kieër ins oetprobere. Ich vraog ane ober eine Belzje trappist. Dan vreugtj hae: ‘Eine Westmalle of eine Grimbergen?’ Dan zèk ich:  ‘Doot mer eine druuëge!’ Astj eine ober is mèt ein bitje humor zal hae lachendj nao ’t buffet loupe en trökkome mèt eine nate Leffe.

LeiS