Wae wore thoês mèt ein tamelik groeët hoêshaoje. 5 jònges en 3 vroulu.
Miên vader wirkdje in ein febriek en most de cente binnebringe. Zelfs op zaoterdigmörge kwaam de febrieksbös al vreug aangereje òm de wirknemers op te hale.
Mien moder zörgdje veur ’t hoêshaoje. Ze haaj de heinj vaôl ane aêt, de was en ’t gepoets. En nateurlik ane opveujing vanne jòng want dao meudje pap zich neet mèt.
Wat moge wae alwiel toch völ! Moge is ‘in’.
Wae haje bie ein bekindje meubelboulevard in ’t zuide ein noe taofel gekochtj en wae woeëje bie kassa 17 gaon betale, zeet de gael-blauw juffrouw: “Gae moogtj de pas effe door de gleuf hale”. Ze bedoeldje nateurlik det ich det MOST doon, mer det klinktj sjienbaar get té dwingendj.
Al op jònge laeftiêd kriege de kiendjes op sjool dao mèt te make. De juf zeet: “Beste kinderen, jullie mogen nu je pen en je schrift op tafel leggen”. Ouch zu bedoeltj det de kiendjes det MÒTTE doon. Ze zeet neet tege ein vervaelendhj menneke ‘Ga jij onmiddelik op de gang staan!’ mer ze zeet: ‘Jij MAG even op de gang gaan staan tot je afgekoeld bent!’ Eigelik zooj zoeën menneke ins mòtte zègge: ‘Maag det of mòt det?’
“Hòndsjstroôntj oppe stoep”. Det bliêkt nog steeds ein vanne groeëtste ergernisse van minse te zeên.
Dorròm hoeëg tiêd veur ein
INTERVIEW MÈT HERDER HERTA, HOÔNDJ
Morge Herta! Good geslaope?
Geit waal, bin paar kieër wakker gewore door de hoôndj hiênaeve.
Ich zeen desse waal ein lekker zaochte manj hebst?
Jaowaal, euver mien manj heb ich neet te klage.
Lieëtj diene baas dich ouch geregeldj d’r oet?
Det is te doôn; ‘ne kieër of twieë per daâg
En maaktj gae dan ein lang wanjeling?
Och, det is bekans eders kieër ’tzelfdje rundje; bitje routinewerk.
Woeë moogst dich dien behoefte doon?
Det liktj d’r aan. As ich mòt plasse doon ich det ònger ’t loupe oppe stoep en as ich mòt poepe dan maag ich effe los op ’t graasveldje naeve de sjool.
Lees verder “INTERVIEW HERTA”
Edere daag kome d’r waereldjwiêt hieë völ internetsites biê. Neet allein van bedriêve, mer ouch van door-de-waekse minse. Wat opvèltj is det de name van die sites almer langer waere. De mòst ieërst drie kieër mèt de ouge rolle veurdesse ze kinst laeze. Ein paar veurbieëldje:
‘www.helpmijncomputerlooptsteedsvast.nl ”www.makkelijkerkunnenwehetnietmaken.nl‘ ‘www.achttienjaarvrijenmaar.nl‘
Neet allein in Hollendj keumtj dit versjiensel veur. Net euver de grens in Belsj kinse d’r al ein paar vinje.
– ‘www.hetlekkerstefrietekotvangeistingen.be‘ – ‘www.eenpintekedagelijksdoetenemensgoedzulle.be‘
Oppe ròmmelmêrtj tösse 2e-hansj kleier zaag ich ein klak ligge. Doonkergriês mèt veurop sjoeën keupere lètters PTT. De mins achter ’t kräömke vroog d’r drie euro veûr! Ich heb ze effe opgezatte, keek in eine spegel en zaag weer drek miene oeëm veur mich dae jaorelânk bie de post heet gewirktj. Toen de PTT nog ein oerdegelik instituut waas. Wirke bie de post dieëtse zoeëget veur diên hieël laeve; einmaol post, altiêd post. De klak haaj door de jaore haer ein groef in ziêne verweerdje kop en ziên kapsel achtergelaote. Det kreeg de kapper neet mieër good.
Edere aovendj roondj ein oor of 11 duike mien eega en ich in bèd. Nou ja…duike. Wae lègge os d’r gewoeën in. In ’t weekend kan ’t waal ins get later waere, want dan kome d’r knabbeldinger oppe taofel en dan heet de tillevisie nog waal ins get aardigs. Noê laas ich ein dees daag ein òngerzeuk van eine Ingelse dokter. Ein òngerzeuk woeë dae goje mins jaore euver gedaon heet. Tis dus neet zòmmer get! De conclusie waas det apaart slaope van man en vrouw baeter is veur de relatie. Want, as ein van de partners ònröstig slieëptj of snörktj ister ein kans van 50% det de slaop van de angere weurtj verstuuërdj.
Het is ein gek dink! Zoeë gauw aster bie de klei-jerwinkels de vètte posters mèt “SALE” (oetgesproke as “seel”) veur de etalage-roête hange òntwaaktj bie bie mien vrouw ein sluimerendj virus. De kònse neet wègdoewe of negere. Det ister gewoeën! Dao zeen trouwes genògt minse in ’t Wieërter landj die “SALE” oetspraeke as “SALEE”
SALE beteikentj simpelwèg “oetverkoûp”. ’t Heet sjienbaar nog mieër aantrèkkingskracht as det in ’t Ingels weurtj aangekondigdj. Sòms waere d’r nog anger groeëte pepere biê gehange woeë-op steit wievöl procent korting d’r waal neet gegaeve weurtj, variërendj van 10% tot waal 50%! Det wirktj bie ’t opkomendj virus nog ins wie eine roeëje lap op eine stier. Dao’s neet tege te vechte. Dao mòt!!! nao de stad gegange waere. Klei-jer vandoon of neet.
| Wie gaon wae oos kiendje neume?? Die vraog is door aankomendje aojers lichelik altiêd al gestèldj. Vreuger waas naamgaeving gein probleem. De boreling woord verneumdj nao oeëm of tante, opa of oma. Aaf oet! En anges kwaâm d’ein of d’angere heilige waal in bieëldj. Kiêk nao de liêstjes hiê-ònger en vergeliêk die mèt det van 1950. Trèk dan dien eige konkluzie……. jònges Nederlandj 2020 waereldjwiêt 2020 Rooj ± 1950 Arthur Milo Zjeng Noah Asher Harie Jules Atticus Pjaer Louis Oliver Bèr Lucas Levi Tiés Liam Silas Tjeu Adam Arlo Driek Victor Leo Zjef Gabriel Theodore Koeëb Mohamed Jasper Zjang maegdjes Olivia Mary Marie Emma Elizabeth Nel Mila Alice Lies Louise Anna An Lina Grace Tru Alice Katherine Mie Sofia Olivia To Mia Sarah Lieën Anna Victoria Bet Juliette Donna Mina LeiS |
In de communicatie nao anger minse speule gebare ein erg belangrieke rol. Gebare zeen sòms zelfs dudelikker dan weurd en spraeke in völ gevalle ein internationaal taal.
Emes ein handj gaeve beveurbieëldj kan beteikene:
Hallo! Aangenaam! Houdoe! Proficiat! Gekondoleerdj! Bedânktj!
De kinst gebare make mèt dien hieël liêf. Mèt dien naas, mèt diene moôndj, mèt dien ouge. Mer as wae os allein ins beperke tot hândj /erm / vinger dan zeen d’r ouch al erg völ meugelikhede.
Lees verder “GEBARE”
Aaf en toe kiêk ich waal ins nao ein klus-programma oppe tillevies. Des amuzant en ergelik tegeliêk. De zuûst manne van ’t type Ed en Willem Bever mèt eine brei-je glimlach allerlei klusse klaore.
In tegestèlling tot wat ich presteer verluiptj bie die men alles sònger probleme. Eine tegeslaâg kinne ze neet. De zuust noeët eine klusser dae in eine pot verf treutj aster ’t trepke aaf keumtj. Ein baan behang pèstj de ieërste kieër en sjeurtj noeëts. Ouch noeët eme dae zich mèt de hamer op ziene doem houtj of bie weem de beitel oetsjutj. Aster ein stök hout in verstek mòt waere gezaegdj löktj det de ieërste kieër en dao hooftj niks gesjaafdj of gesjoordj te waere. Eine kieër flink vloke, zoeëwie ich det waal ins doon keumtj bie die men neet veur.
Nae, bie Ed en Willem geit ’t allemaol feilloos en ouch nog in ein rap tempo. Tösse ’t geklus door zûse òmme haverklap flitse veurbiêkome van doe-het-zelf groeëthede wie Praxis, Gamma of Hubo. Dao zûse noeëts eine kwaoje klantj binnekome dae ziên geldj trök wiltj hebbe òmdet ’t boormesjiên ’t neet duit. Nae, bie P,G of H verluiptj alles nao wins en de klantj is drie kieër keuning.
