PUNT.NL

 

Edere daag kome d’r waereldjwiêt hieë völ internetsites biê. Neet allein van bedriêve, mer ouch van door-de-waekse minse. Wat opvèltj is det de name van die sites almer langer waere. De mòst ieërst drie kieër mèt de ouge rolle veurdesse ze kinst laeze. Ein paar veurbieëldje:

‘www.helpmijncomputerlooptsteedsvast.nl ”www.makkelijkerkunnenwehetnietmaken.nl‘  ‘www.achttienjaarvrijenmaar.nl

Neet allein in Hollendj keumtj dit versjiensel veur. Net euver de grens in Belsj kinse d’r al ein paar vinje.

– ‘www.hetlekkerstefrietekotvangeistingen.be‘  – ‘www.eenpintekedagelijksdoetenemensgoedzulle.be

Dao is neet völ fantazie veur vandoon òm te bedinke wat ze beveurbieëldj in Pruses oetvinje aan boetegewoeën titels:

‘www.daskannnurinkaldenkirchen.de‘  ‘www.wennmannlusthatsollmannesnichtlassen.de

Veuruit, dan ouch innegang mer ein paar Franse d’r achteraan:

‘www.apreslefromageetlevinlamour.fr  ‘www.quoifairequandtafemmeestpartie.fr

Wòrròm bedinke minse van die lang titels? Òm interessant euver te kome? Òm de konkurrente de loef aaf te staeke? Òm op te valle? Weem zaltj zègge?  Henjig is ’t in eder geval neet. Want mèt zoeëne lange naam hebse dich nog ins gauw vertyptj en dan geuftj de computer neet thoês. Mòsse weer opnoe beginne.

Mer toch….toch zitjer ouch waal get oetdagendsj aan dees moeëdegril. Teminste, veur minse die d’r ein bitje luchtig mèt òm wete te gaon. De kinst d’r dien fantasie in kwiêt en de kinst d’r diene eige humor op los laote. Want laot os ieërlik zeen:  ‘www.ncrv.nl’ is waal érg mager.

Ich heb mèt det idee get  zitte speule en bin tot de conclusie gekome det ’t de mote waerd is òm d’r ein wèdstriêdje van te make. Òngergeteikendje nuuëtj uch oet eur gedachtespinsels de vrieje loup te laote en get origineels te bedinke.Die moogtj gae dan nao de redactie steure. Mesjien kònne de meist originele waal op dit plekske gepubliceerdj waere!

Òm uch op weeg te helpe ein paar veurzètjes:

‘www.weemweiteinebaeterenaamveurkwartierstaete.nl‘     ‘www.tisgoodaetebiedeluifel.roy

en tot slot

‘www.hetmòtneetvölgekkermieërwaere.nu‘.                                                              Dootj eur bèst.

LeiS