SLAOPE

Edere aovendj roondj ein oor of 11 duike mien eega en ich in bèd. Nou ja…duike. Wae lègge os d’r gewoeën in. In ‘t weekend kan ‘t waal ins get later waere, want dan kome d’r knabbeldinger oppe taofel en dan heet de tillevisie nog waal ins get aardigs. Noê laas ich ein dees daag ein òngerzeuk van eine Ingelse dokter. Ein òngerzeuk woeë dae goje mins jaore euver gedaon heet. Tis dus neet zòmmer get! De  conclusie waas det apaart slaope van man en vrouw baeter is veur de relatie. Want, as ein van de partners ònröstig slieëptj of snörktj ister ein kans van 50% det de slaop van de angere weurtj verstuuërdj.

 

Ich zagt det tege HEUR en die vònj de conclusie hieël begriepelik. “Dich likst ouch dèkker almer te drei-je” zagt ze. “Ich waer waal ins wakker en dan hebst dich alle dekes nao dich haer getrochtj. En asse get beer te völ op hebst snörkse wie eine os!” Dao zal ZU waal geliêk in hebbe. En ze zal ouch waal mieër last hebbe van mich dan ich van heur. Tis al paar kieër gebeurdj det ZU nao eine aovendj stappe zagt: “Gank dich mer fijn oppe bank ligge!” Die haaj de snörk-pertie al aan zeen kome. Det mins en vrouw same in ein bèd slaope liêktj hieël logisch. Mer det sjientj ieëwe lânk neet zoeë te zeen gewaestj. Zelfs Abraham en zien vrouw Sara laefdje en slepe in ein apaart vertrèk. Steit inne bijbel. Ouch de aoj Grieke slepe apaart. Allein aster kiendjes gemaaktj moste waere dan krope ze in ‘t huweliksbèd.

In ‘t laeve van eine mins zeen d’r drie dinger diese hieëlemaol allein mòst doon. Det is: Gebore waere, doeëd gaon….en slaope. Det klinkt vreemdj, mer asse bitje logisch naodinkst heet gaon slaope waal wat verwantjsjap mèt doeëdgaon (van de waereldj zeen) En wakker waere heet waal wat euvereinkomste mèt gebore waere.

Het òngerzeuk zeet wiejer det minse die acht oôr lânk naeve ein in bèd ligge ònbewustj toch get nao deindanger oetstraole. Zeker asse mèt eine kwaoje kop nao bèd bèst gegange.  Want dan zend se, net wie eine radio-zender wrevel oet. Lestigheid. Gebròk. En dae angere veultj det in ziene slaop aan. Woeëdoor  het lekker òntspanne maffe (völ) minder weurtj. Ich kan mich waal get veurstèlle bie dees theorie.

Mer jòng stèlle zulle zich nateurlik niks aantrèkke van bovestaondj verhaol. Die wille zoeë dek meugelik bie-ein in ‘tzelfdje nèst ligge. Lekker kort bie-ein ouch nog. Des dudelik en begriepelik; die hebbe nog te make mèt ‘r roze-wolk-syndroom. Mer die wolk weitj langzaam euver

 

LeiS