INTERVIEW HERTA

 “Hòndsjstroôntj oppe stoep”. Det bliêkt nog steeds ein vanne groeëtste ergernisse van minse  te zeên.

Dorròm hoeëg tiêd veur ein

INTERVIEW MÈT HERDER HERTA, HOÔNDJ

Morge Herta!  Good geslaope?
Geit waal, bin paar kieër wakker gewore door de hoôndj hiênaeve.

Ich zeen desse waal ein lekker zaochte manj hebst?
Jaowaal, euver mien manj heb ich neet te klage.

Lieëtj diene baas dich ouch geregeldj d’r oet?
Det is te doôn; ‘ne kieër of twieë per daâg

En maaktj gae dan ein lang wanjeling?
Och, det is bekans eders kieër ‘tzelfdje rundje; bitje routinewerk.

Woeë moogst dich dien behoefte doon?
Det liktj d’r aan. As ich mòt plasse doon ich det ònger ’t loupe oppe stoep en as ich mòt poepe dan maag ich effe los op ’t graasveldje naeve de sjool.

Ich neem aan det dao mieër hunj heure keutel nieërlègge!?
Zeker, ’t krioeltj d’r van. In alle kleure, formate en samestèllinge. Vreuger haaj ich de drang òm aan eder huipke efkes te rûke, mer dao is gein beginne mieër aan.

’t Zal dao dan ouch waal stinke?
Dao zese get! En ich kan neet wietj gae minse mien naas toeniêpe!

Heet de baas ouch altiêd ein sjöpke bie zich?
Jaowaal, det heter waal bie zich…mer…

Mer?
Mer hae gebroêktj ’t bekans noeëts! Proont ofter zich sjaamtj mèt det sjöpke.

Det snapse toch neet!
Aster anger minse inne buurt zeen dan paktj hae miên keutelke op ’t sjöpke en  deponeertj  det netjes in ’t rioolpötje. Mer des mieër veur ’t oug.

En anges?
As nemes kiêktj lieëtj hae ’t gewoeën ligge. Of hae sjuuftj ’t bitje ane kantj.

Des toch neet netjes?
Vinj ich ouch neet, mer jeh, ich kantj hum neet zègge. Ich heb al ein paar kieër aan zien bòksepiêp getrochtj òm hum det dudelik te make.

Mer hae snaptj det neet?
Nae, hae dinktj dan det ich ein bitje wil speule en zeet allein mer: ‘Af!’

Mesjien ister ein anger meneer òm hum te laote wete det det ònfatsoenlik is.
Ich zooj neet wete wie ich det most aanpakke.

Hebse ouch hònsj-vrinj?
Vrinj precies…mer ich kin waal ein paar hunj oete buurt.

Ich bedoel mieër het soort det vriê maag roondjloupe
Jao, ich kin Maks en Bruno en Tippy en Lex…

Spraek mèt heur aaf òm allemaol bie diene baas ein paar fraai keutele op ’t gezòn nieër te lègge. Wie mieër houps wie baeter! Dan zal ich ein breefke laote bezörge mèt de boeêdsjap:

 Eine hoôndj
Kan ziêne stroôntj
Neet zelf in ein zekske deponere
Det is werk veur ziêne baas
Mer det is dèk, helaas
Eine mins sònger menere! 

Good idee?
Prima plan!

Herta, bedanktj veur dit interview.