nummer

NUMMERS

 

Nog neet zoeë lang geleje kreegse bie “De Limburger” geregeldj ein beukske geleverdj mèt de titel: “Nummer 1” Toen al vònj ich det geine echt orizjinele naam. Want ich bin ins naogegange wievöl versjillendje beteikenisse det weurdje nummer kan hebbe

Ein nummer kan ein getâl zeen. 7 of 312. Zelfs as achter det getâl ein lètter  geplektj weurtj dan blieftj ‘t nog steeds ein nummer.  Ich kan beveurbieëldj woeëne op de Margrietstraot 14a. Det is dan ein hoêsnummer. 

En 06-12345678 is dudelik ein   tillefoonnummer. ‘t Gael bördje mèt zwarte lètters op diene auto neume ze ein nummerplaât.

Dao kan ouch ein leedje mèt bedoeldj waere. ‘My way’ det door hieël völ artieste is gezònge, vinj ich ein sjoeën nummer. De Beatles hebbe völ sjoeën nummers gesjreve. Trouwes, ouch ein leedje sònger weurd, ein instrumentaal oetveuring,  kònse ein nummer neume.

In ‘t circus  huuërse ‘t woord in versjillendje samestèllinge. Ein act mèt ein paar wilj bieëste en ein zweepke weurtj beveurbieëdj ein tijgernummer geneumdj. Dae gekke pipo mèt  té groeëte sjoôn en ein roeëj naas duit ein clownsnummer. En de minse die aan ein paar touwe door de locht op en nieër zwiepe veure ein trapezenummer op.

Nummer kan slaon op eine persoeën. Ederein weit weem bedoeldj woort mèt nummer 14. In det geval hebse ‘t euver ein röknummer. Van eine kwibus dae allemaol gekke fratse oethaaltj zeet men waal: ‘Des ein fraai nummer dae!’. En emes dae se terecht wilst wiêze kinse ins flink op ziên nummer zètte.

Weurtj ein book oetgegaeve via de officiële weeg dan kriegtj det book ein ISBN-nummer.

Wiejer veule hieël völ minse zich neet mieër dan ein nummer bie verzekeringe, belastinge, zekehoeze, hypotheekverstrèkkers en anger officieel instanties. Zelfs bie de slegter en de bekker mòsse ein nummerke trèkke aster get völ minse inne rie staon. In det geval is ein nummer gewoeën ein pepeerke!

Nummers zat dus. Of bin ich get vergaete? Ister nog get mieër te nummere? Jaowaal! Asse de liêst nóg ein bitje langer wilst hebbe kinse nog altiêd ein nummerke make!

LeiS