Völ eikes aete is neet good, want det verhuuëgtj de potentie ònnoemelik. Tis ein veròngerstèlling die al hieël get jaore de rundje duit in ’t arsenaal van volkswiêshede. Ederein duit dao waal ein bitje lacherig euver mer ’t speultj toch stiekem bie völ minse door de kop. Mer wat bliêktj noê oet degelikke òngerzeuke?? Potentie en eikes hebbe niks mèt deindanger te make. Eme dae noeëts eikes itj kan vrieët potênt zeen. Fabeltje dus. De kinst d’r hoeëg-oet wat vervaelendje bròbbele van kriêge.
WÈKKER
Inins leep hae neet mieër aaf. Miene wèkker dae mich jaore precies op tiêd wakker geklingeldj haaj leet ’t op eine goje (?) mörge inins aafwete. As mien vrouw mich neet eine elleboog in mien zie haaj gedoedj haaj ich mich zeker verslaope. Vrouluu hebbe zoeëget wie eine ingebouwdje wèkker dae aafluiptj aster get mis dreigtj te gaon. Oerinstict tummich.
Wae nao de winkel òm get noets te koupe. De keus veel op eine wèkkerradio. Gae laestj ’t good, wèkkerRADIO. Dae angere waas gewoeën eine wèkker met zoeën mechanisch haemerke det tege ein belke aanhoutj. Mieër neet. Simpel mer doeltreffendj!
POLESTAR
Mesjien hebtj gae nog örges ein klein 80.000 euro ligge woeë neet drek ein bestumming veur gevònje kan waere????
Dan is dit mesjien ein optie! De POLESTAR 2 BST 270 EDITION.
Nae. tis gein raket die in korte tiêd nao de maon op en nieër vluugtj. En tis ouch geine super-de super de suup-stofzuiger.
Nae tis eine auto! Gae wètj waal, zoeën dink op veer rajer, mèt ein steur, eine motor en mèt 4 steul d’r in dae uch komfortabel van A nao B kan bringe. Mer dit model heet tig kieër mieër potentie dan eine gemiddeldje auto. Gaotj d’r mer veur zitte! Deze heet ein “performance-pakket” en is 476 pk sterk! Tis eine elektriese nateurlik, want weem geit nog bie ein tank-beurt zitte knoeëje mèt dröppendje en stinkendje benzien-slange?
TWIEËTALIG
Hoewaal ’t aantal langsem minder weurtj kalle de meiste minse in Limburg het dialekt van heur eige dörp.
Al die dialekte kònne òngerling sterk versjille! Asse emes oet Venlo huuërst kalle en daonao emes oet Sjin op Geul of oet “Kirchrao” dan merkse eine waereldj van versjil. Des neet erg, des zelfs hieël good. Ein boontje verzameling van dialekte is ein biezunjer versjiensel en dreugtj biê aan ’t rieke culturele laeve in Limburg.
Òmdet alle Limburgse dialekte nogal aafwiêke van ’t Hollensj kònne wae euver ’t algemein waal zègge det Limburgers twieëtalig zeen. As die Limburgers daonaeve ouch nog flot Ingels en Duits kalle zeen die dus zelfs mieërtalig.
KERKE
Boete ònger ’t aafdaâk vanne super staon waal 100 kerre. Netjes inein gesjove en mèt kèttinge aanein vast gemaaktj. Òm éin kerke los te koppele mòsse 50 cent of eine euro in ’t gleufke stoppe.
Ich kiêk inne portemonnee. Jaomer, wáál muntjes van 2 euro, 20 en 10 cent mer neet woeë ’t gleufke òm vreugtj. Dan mer ieërst de winkel in om get te wissele. Het kassa-maegdje is drök bezig en ich probeer tösse twieë klantje door mien muntjstök gewisseldj te kriêge.
Det löktj, ouch al veul ich mich ein bitje veurkroêperig. Trök nao de kerre. Ich trèk d’r ein oete rie en steur richting ingânk.
LINTJE
…Het heeft Zijne Majesteit behaagd….
Dees openingszin zal door völ börgemeisters of anger notabele ein puuëske geleje zeen oetgesproke bie ’t opspelle van ein lintje bie eine glunderendje decorandus. Det huuërtj zoeë; ‘t keumtj vanne keuning, dus maag de taal bèst waal get verheve zeên. Mer Alex zelf weit echt neet wat of weem hum heet behaagdj. Hae weit eigelik nörges van.
Het lintjesversjiensel kinse aaf en toe mèt gefroonsdje winkbrauwe bekieke. Want gebeurtj ’t neet dèk det eme dae gein lintje verdeentj tóch ein kriegtj en eme dae ’t écht verdeent…dae kriegtj ’t neet. Veur de meist ònnuuëzel activiteite kinse eine goeëj doon nao ’t ieëremetaal. Bèsse 30 jaor lid vanne handjbalklup en haalse daobiê ouch nog eder waek aod pepeer op…dan weurse tot ridder geslage. Bèsse 25 jaor veurzitter vanne bridgeklup en zitse al 15 jaor inne gemeindjeraod…ouch dan maag ein òngersjei-jing op dien jeske gepriktj waere. De hoofst allein mer te zörge veur eine degelikke achterban die feite ein bitje aandikke.
Aster ein lintje oetgereiktj dreigtj te waere dan is ‘t wáál zaak det de betrokkene van teveure van niks weit, want anges is de aardigheid d’r aaf. Stiekem gemail, gebel, ge-SMS van femilie en vrinj òngerein mòtter veur zörge det de fieësteling totaal verrastj weurtj. Hetgeen inne meiste gevalle mislöktj. Want dan stiktj ein aoj wiêsheid de kop op: “Wete ’t d’r twieë dan istj ein geheim wie ein kloés; wete ’t d’r drie dan is de openbaarheid drek dao!” Het is nateurlik te hope det eine gedecoreerdje lang gooddoon maag hebbe van zien lintje, en detter d’r dèk mèt maag tuine. Want de hebst d’r neet veur niks zoeëvöl mote veur gedaon òm ’t te bemachtige…
Helaas, oûch lintjesdragers gaon eine kieër doeëd. Des op zich al ein bedreuvendje gebeurtenis. Mer dan keumtj bie alle leid óuch nog ins kieke det de femilie het lintje mòt trökgaeve!!!! Det geuftj te dinke! As ’t de keuning in al zien gotigheid behaagdj heet…mer hae wiltj ’t spul later weer trök hebbe, dan is mich det ge-behaag gein viêf cent waêrd. Dan hebse efkes ein bitje waardering moge lieëne, mer neet haoje. Wat ein gezwabber! Dus as sjriêver dezes oeët ein lintje mocht kriêge òmdetter edere maondj eine kollum inein dreitj en hae stiktj (hopelik völ jaore later) de puuëj veurgood wèg, dan mòt ‘t lintje mèt de kist in. Mer trökgaeve?? Niks daovan! Ins gegaeve blieftj gegaeve!
LeiS
FRIET
Eine kieër per waek is ’t in huize kollum-maeker frietdaag. Des al jaore zoeë. Op woonsdig weurtj d’r neet gekoôktj. Dan rietj òngergeteikendje nao de friettent en lieëtj zich dao binne 10 minute eine werme hap klaormake. Friet nateurlik, mer ouch nog get sneks, zoeëwie bami, frikkedel of kroket.
Sòms maaktj Zu zélf friet. Des goodkouper. Mer ’t naodeil is det ’t hieël hoês nao ein keteer bakke vôl hingtj mèt friet-locht en die ister neet zòmmer oet. As de stekker d’r oet is getrochtj zèt ich meistal effe alle deure tege ein ope zoeëdet de windj de geur de boete in kan driêve. ’t Hulptj mer ein bitje.
STOFZUIGER
Volges de wederhelft wore wae toe aan eine noewe stofzuiger. Neet det de aoje niks mieër dieë, mer hae haperdje aaf en toe. En ’t model waas ouch get van veur de oorlog, vònj ze. ’t Argument: ‘De kinst de aoje aevegood nog gebroêke inne geraasj en òm de auto te zuige’ leek mich redelik, dus zu kreeg heur zin.
Wae nao de winkel en get noets gekochtj. Inne aanbejing. Fel roeëd kleurke en traploos verstèlbaar in zuugkracht. Mèt de nuuëdige hulpstökke en ein extra duuëske stofzuigerzek. Goje koup gedaon dus.
VASTELAOVENDJ
De optocht is aafgeloupe en ederein zeuktj zoeë snel meugelik de kroeg op. Want de veut zeen kaod en dao istj lekker werm.
Minse die van bove tot ònger geverfdj en verklèdj zeen minge zich mèt klantje die neet de mote genome hebbe òm d’r ein bitje vastelaovesechtig oet te zeên. Gewoeën in börger dus. Ich heb mich teminste nog ein stök pruûk en eine hood opgezatte. ’t Ieërste glaas beer drinktj zich neet mèkkelik. Mer wat mòt mòt!
GEMIDDELDJ
’t Lèste rapport van mien dochter haaj get wèg van de grafiek vanne beurs. Hoeëg pieke en depe dale. Veur ’t ein vak haaltj ze ein neuge, veur ’t anger ein drie en alles dao tössenin. “Mer gemiddeldj” zagt de lieëraar oppe aojeraovendj, “gemiddeldj steit ze op ein dikke zès. Des dus voldoende. Asse det zoeë vôl hèltj kan ze euver nao de volgendje klas”. Ederein kontent zootse dinke. ZU neet. Die heet nog degelikke gedachte en zuût lever veur éder vak ein voldoende! Het blieftj nateurlik waal get òm euver te steggele.
Hebse dao get aan, aan “gemiddeldj? ” Kònse dao get mèt? Sòms kònse d’r diên veurdeil mèt doon, sòms kan ’t tege dich wirke. Ein paar veurbieëldje oete dagelikse praktijk. Gemiddeldj was ich 4 kieër per waek iêverig aaf. Det zooj op ein totaal van 7 net voldoende mòtte zeên. ZU vintj van neet. Gemiddeldj gaon ich òm ’n oor of elf nao bèd. Des netjes! As ich eine kieër òm veer oor snachts thoêskom dan haaltj det ’t gemiddeldje aardig òmlieëg…mer ’t blieftj gemiddeldj toch nog dik voldoende. ZU kan neet achter die redenering staon.
Gemiddeldj doon ich mèt ein bekske beer 2 waeke. Veurige waek, toen d’r völ voetballe oppe tillevies waâs bleek de bak op drie daag tiêd al leeg te zeen. Mer gemiddeldj kwaam ich in dae maondj keurig aan eine bak inne 2 waeke. Neet verkieërdj dacht ich zoeë! Mer nae, eine dergelikke kiêk oppe zaak is te kort door de bocht, waas HEUR stèllige meining.