Inins leep hae neet mieër aaf. Miene wèkker dae mich jaore precies op tiêd wakker geklingeldj haaj leet ’t op eine goje (?) mörge inins aafwete. As mien vrouw mich neet eine elleboog in mien zie haaj gedoedj haaj ich mich zeker verslaope. Vrouluu hebbe zoeëget wie eine ingebouwdje wèkker dae aafluiptj aster get mis dreigtj te gaon. Oerinstict tummich.
Wae nao de winkel òm get noets te koupe. De keus veel op eine wèkkerradio. Gae laestj ’t good, wèkkerRADIO. Dae angere waas gewoeën eine wèkker met zoeën mechanisch haemerke det tege ein belke aanhoutj. Mieër neet. Simpel mer doeltreffendj!
Dae heet hieël völ knupkes. Té völ eigelik. Op ein van die knupkes steit “Snooze” Det beteikentj zoeëvöl as “sluimere” of “nog effe hieël licht ligge te maffe. Asse dae knop indoetst dan kinse dich nog eine kieër òmdrei-je en 9 minute later luiptj de wèkker weer aaf, of baeter, geit de radio automatisch aan. Verslaope kan dus eigelik neet mieër.
De ieërste paar kieëre liêktj det inderdaad ideaal, mer det ideale ister stilaan aaf aan ’t gaon. Want wat gebeurtj mich allewiel? De roeëj lètterkes zègge detj 6.45 is gewore. De radio floeptj aan. Ich doe op “Snooze” en trèk de dekes euver miene kop. Héérlik! Nog effe neet op!
Mer…..bitje later doon ich toch stiekem éin oug ope òm te kieke wievöl minute d’r van die 9 nog euver zeen. Nog 7. Des neet drek òm gojen aard van te kriege mer ich hoof nog neet ònmiddelik op te staon. Ich doon ein twieëdje poging òm nog hieël efkes echt te geniete. Det löktj neet. Weer ins ein paar kieër òmgedreidj en dan weer ins kieke wielang ’t NOÊ nog doortj veur de 9 minute òm zeên. Nog 3. Des neet de mote òm nog effe te snoozele. Dus likse te wachte tot ‘t 6.54 is en det moment keumtj tóch weer eders kieër ònverwachs! ’t Is zelfs zoeë det ich d’r mèt michzelf eine wèdstried van aan’t make bin. Dan spoeëktj d’r zoeëget door miene kop van: “As ich dalik kiêk steiter op 6.50”. Of: “Ich tèl tot 10 en dan springtjer òm”. Ich kom mèt die sjatting edere daag korter bie de echte tiêd.
9 Minute langer slaope?? Vergaet ’t mer! Tis ieërder 9 minute korter!
Snooze knop? Lekker modern mer veur mich niks waerd!!
LeiS