VASTELAOVENDJ

De optocht is aafgeloupe en ederein zeuktj zoeë snel meugelik de kroeg op. Want de veut zeen kaod en dao istj lekker werm.

Minse die van bove tot ònger geverfdj en verklèdj zeen minge zich mèt klantje die neet de mote genome hebbe òm d’r ein bitje vastelaovesechtig oet te zeên. Gewoeën in börger dus. Ich heb mich teminste nog ein stök pruûk en eine hood opgezatte. ’t Ieërste glaas beer drinktj zich neet mèkkelik. Mer wat mòt mòt!

Tege zès oôr staon minse  opein gepaktj  en prebere ein paar halfvol glaze beer te bemachtige die eigelik völ te deur zeen. Want de slumme kastelein heet mèt die daag gauw 20 cênt oppe priês gezatte. De muziek steit keihaard! De conversatie mèt diene buurman löktj allein door òm beurte in deindangers oeër te kake. Det ’t gesprek nörges euver geit maag dudelik zeen. Mer good, stiekem kriese op korte tiêd toch aardig wat gaelkoppe binne die almer baeter beginne te smake. De keumst oppe wc ein paar bekindje tege die dich oetnuuëje òm d’r same nog ein paar te pakke. Het weurtj wermer, de stumming stijgtj en ’t zicht weurtj get minder.

Dan begintj de maag get te knorre en de weurst euvergehaaldj òm neet heivers te gaon aete mer de friettent binne te stappe. Dao istj zoeë meugelik nóg drökker. De sfeer is wat lallerig. Nao ein keteer bèsse eindelik ane beurt en de bestèlst ein frietje zoôr vleis, ein frikkedel en ein tas koffie. Mer veur desse aan ein staontaofel kinst gaon hange zeen de friete en de frikkedel al half kaod. De koffie is door al det gesjravel  half oete tas geloupe en is op ’t sjeutelke gaon ligge. Mer oké, de wilst neet te krek kieke en de itst en drinkst alles op. Want sònger boom bèsse verlore. Dan vervolgse mèt dien maote de kroegetocht totj neet mieër geit. Wie laat ’t òngertösse is gewore is dich volledig òntgange. Diene hood zitj neet mieër oppe kop en de pruûk hingtj sjeif euver dien oeëre. De weêg heivers luiptj neet recht en de kinst ’t neet laote òm viêf kieër naeve de stoeprandj te traeje.

Op ein wònjerlikke meneer löktj ’t dich toch òm ane veurdeur te kome. De ieërste vastelaovesdaâg zitj d’r op. Het waas knoergezellig!