Zooj ’t toeval zeen of hebbe minse ’t bewustj zoeë gesteurdj. Hebbe we d’r nao ein jaor van sjörrige behoefte aan òm dinger te organisere die wae fieëste neume? Ich gaon knap dinke van waal. Want wat hebbe wae in de lèste fase van ’t jaor allemaol op eine houp gedoedj. Wat vèltj d’r op korte tiêd allemaol te vere? Wae laote ieërst Sint Merte mer ins langskome. Neet det det get vrieët speciaals is, mer vreuger waas det toch waal ein reje òm de treurige, doonkel daag get aangenaams te gaeve. Veurke stoke, deindanger insmere, langs de hoezer gaon veur snuik, leedjes zinge en werme chocomel drinke. Inne moderne versie is Halloween d’r biê gekome, woeëbiê mèt lemkes en oetgeholdje pompoene fieëstelik roondjgetrochtj weurtj.
Dan meine wae oppe 11e vanne 11e ouch weer te mòtte balkenere omdet de vastelaovendj aangekondigdj weurtj. En as de ieërste confetti opgeruumdj is steit Sinterklaos alweer veur de deur. Kedootjes waere oetgedeildj, gedichte gesjreve en speculaas gaete. Zeker veur geluivige wichterkes reje veur glunderendje gezichte.
Daonao geit ’t stilaan op Kerstmis aan. Det gebeure heet de minsheid sjienbaar zoeë aangesproke det éine daag fieëste neet genògt waas. Nae, het mòtte d’r twieë zeen! En òm die twieë daag vôl te kriege zeen d’r groeëte sjrânspertieje georganiseerdj, woeëbiê veural kalkoene, haze, knien en anger wildj de pineut zeen. Ouch de drankhanjel maag roondj deze tiêd neet klage.
As de kerstboum door de versnipperieër is gegange en ’t kribke weer trök oppe zolder is gezatte, kome wae terecht in ein soort vacuüm. Weem de kans heet gadj òm get snipperdaag te verzamele gebroêktj die in dees periode. En asse neet nao de baas hoofst is det aanlei-jing òm lui achtereuver te hange. Ouch ein bitje fieëst, toch?
As klapper volgtj dan nog Aod- en Noejaor; de jaorwisseling. Ouch bie dit fieëst koste wae os neet beperke tot éine heuglikke daâg. Aete en drinke zeen dan wederom de belangriekste activiteite. Zelfs op 2 januari zeen d’r nog genògt spare-ribs, kûkepuuëtjes en aerpelkrokette euver òm de boêk weer vôl te kriege.
Alles bie-ein dus vrieët völ gefieëst op ’t lèst van ’t jaor. Mesjien get té völ! Det kan anges, det kan baeter! Ich stèl veur òm zoeë roondj de 15e december alle fieëste op eine houp te goeëje, van smörges tot saoves vrieët, hevig en barbaars te tampieëste en daonao…röst ane kop!! En weer gewoeën zoormoos mèt herste en spruûtjes mèt roukworst!
LeiS