APPELESIEN

Zoeëlang de mins besteit heter gedroumdj. Volges kinners dene droume òm indrökke diese hebst opgedaon te verwirke. Wie det allemaol in zien werk geit is neet te verklaore. Dao zeen minse die bewere det ze de droum van emes kinne oetlègge. Ich gluif dao niks van. Wat sjienbaar wáál beweze is is det eine droum mer ein paar sekonde doortj. En in die paar sekonde kinne zich dus in ein raozendj tempo taferele aafspeule diese sòms kinst naovertèlle, sòms mer veur ein gedeildje en sòms ouch hieëlemaol neet.

Miêne lèste droûm ging as volgtj:                                                                                             Ich droumdje det ich ein appelesien waâs. Ieërst hòng ich nog braaf greun aan eine boum in Spanje te hange. Mer door de lekker werm zòn woort ich stillekes aan mieër oranje en ouch voller. Det waas ein fijn geveûl. Bitje loom bungele en loestere nao de bieje die òm dich haer zoeme; aaf en toe striêktj ein keul windje langs dien wange.

Mer dae aangename tiêd doortj neet lang.

Opins weurtj ein houte lei-jer ònger dich gesjove en ein broen hândj die ein sjieër vasthèltj  kniptj dich los van diene vertroedje tak. Same mèt anger lotgenote vèlse in ein rete manj. Ieërst geise door ein wasmesjiên en daonao lègge ze dich te druuëge. Dan kriese ein soort wax euver dien liêf òm de oranje kleur nóg mieër oet te laote kome. Mèt doezendje anger geise ’t vleegmesjiên in, op transport nao ’t noorde, woeëtj braaf kaod is. Dien toekomst is op det moment boetegewoeën ònzeker.

De weurst opgeslage in ein kaal, òngezellige loeëds, wachte op wat kome geît. Mesjien keumse bie Jumbo, Aldi of Lidl op de fruitaafdeiling terecht. Of in de frisse boetelocht op eine mêrtj.

De kortste weêg nao dien inj is asse weurst gesjèldj en drek opgaete. Sònger pardon. Bie de get fiener aangelagdje minse waere ieërst nog de witte sjèlkes d’r aaf gepeuterdj.

Mer mesjien weurse waal oetgepörstj en keumse terecht in ein blikske, ein fles of ein kertònne pak. Net veurdesse  weurst gekonsumeerdj weurse flink doorein gesjödj. Òm koppien van te kriege!

Anger kollega’s kome terecht in ein frisse slaaj of in smeuiige roum-ijs. Det maaktj ’t inj ein bitje draaglijker. Die völ gelök hebbe moge ouch nog ieërst effe bedolve waere ònger ein läögske slaagroum.

Veur de échte bòfkoontje is het laevesinj zelfs ein bitje sjiek. Die waere nao ein  oetgebrèdj diner as toetje geserveerdj same mèt bitterkeukskes. Of ze kome in geconcentreerdje vorm terecht in ein pötje sjoeënheids-zalf. As die zalf weurtj oetgesmeerdj op damesbein die teikene vertoeëne van ein appelesienehoêd is de cirkel roondj en de zaligheid kompleet!

LeiS