Tis neet zoeë desse neet zootst kinne laeve asse beveurbieëldj mer ein bein, eine erm, ein oug of ein oeër haatst. Mer inne meiste gevalle zeen wae door de nateur gezèngeldj mèt 2 exemplare. Des waal zoeë gemèkkelik.
In al zien hebberigheid heet de mins van alwiel zich ouch van völ materiële zake ein döbbel aantal aangesjaftj. Sòmmige kinne zich ein 2e hoês, eine 2e boeët en ein 2e zwumbad permittere, ouch al is dao dèk eine 2e hypotheek veur vandoon.
Ein 2e wc is al bekans in eder hoês te vinje. Wiejer zuse in meinig hoêshaoje eine 2e tillevisie en eine 2e computer. Ich heb al in völ wuuëninge eine 2e doesj gezeen en eine 2e ope haard. En oppe oprit staon 2 auto’s; eine dikke veur de kostwinner en ein kleiner formaat òm de krat vanne Jumbo in te zètte. Inne geraasj steit eine gewoeëne fiets én ein sportiever exemplaar mèt 17 versnellinge.
Hoêsdiere trefse ouch dèk in duplo aan: Twieë hunj, twieë katte, twieë cavia’s (en mieër dan) twieë katte. Mer wie mieër bezittinge desse hebst wie mieër se de sjiên mòst ophaoje detj dich good geit, wie mieër se ane kop hebst en wie mieër desse geist piekere.
- Geise mèt ein of anger mankement nao de dokter en zien diagnose bevèltj dich neet, kinse eine twieëdje geneeshieër òm zien advies vraoge (second opinion)
- Eine mân kan d’r (stiekem) twieë vroulje op naohaoje. (Angesòm kan ouch) Det hèltj meistal neet lang stândj.
- Sòms kinse op twieë gedachte hinke; veur zoeëwaal ’t ein as ’t anger is dan get te zègge. De twiêfel liktj oppe loôr.
- Heet diene partner ouch ein baan dan steise bie de belasting as twieëverdener te book. Des neet altiêd gunstig.
- ’t Optrèkske woeë-in se same mèt dien bure woeënst neume ze “2 ònger ein kap”.
- Nao dien 30e beginse aan dien twieëdje jeugd.
- Belangrieke dokumente mòsse dèk in twieëvoud inlevere.
- “Twieë wete mieër dan eine” is ein wiês spraekwoord.
En zoeë bepaoltj ’t getal 2 veur ein groeët gedeildje dien laeve. Mer….. As eine gemiddeldje manskaerel ins zin heet òm ein pötje beer te gaon nuttige in ein plaatselikke horeca-aangelegeheid dan zeter tege zien vrouw: “Ich gaon d’r mich eine drinke”. Hae zal neet zègge: “Ich gaon d’r mich 2 drinke”. Mer de wederhelft weit allang detj neet bie 2 zal bliêve. De ervaring heet wiejer gelieërdj det ’t kort bie 2 oôr zal zeên veurdet mânleef weer oppe klep vèltj. In det geval is ein hieël breid 2-persoeënsbèd gein euverbodige luxe!
LeiS