IRRITASIES

Waereldjwiêt waere d’r edere daâg godweit wievöl òngerzeuke oetgeveurdj. Neet allein  bie de dokter of in ’t zekehoês, dus op medies gebied,  mer ouch euver de meist gekke òngerwerpe. En, zoeëwie bie bekans alle òngerzeuke, waere dao statistieke van biêgehaoje en gemiddeldjes van beraekendj.

Zoeë is deze maondj ein òngerzeuk oetgeveurdj ònger 3000 volwassene in opdracht van eine groeëte Ingelse producent van badkamers. Men woeë waal ins wete welke irritasies zoeë-al veurkome in ein relasie. Wat bliêktj?

Bie ein Nederlands koppel stiktj per jaor gemiddeldj 312 kieër ein klein ruzie de kop op. Neet drek dramaties mer waal interessant òm te wete woeë men zich zoeë-al aan ergertj en of dao verangering in aan te bringe is.

Bie vroulu loupe de frustasies hoeëger en sneller op dan bie manne. (Det wist ich trouwes al lang) Meistal geit ’t euver vervaelendje gewuuëndjes van de partner. Ein vrouw maaktj zich beveurbieëldj al lestig as ze eine nate handjdook op ’t bèd aantreftj. Of  as ’t leeg wc-rölke neet  vervange is. Hieël hoeëg oppe irritasie-lei-jer staon wiejer: de lampe aanlaote, de verwörming neet petiêd trökdrei-je, almer zitte (of ligge) te zappe, staondjes pisse (en daobiê de wc-brîl neet òmhoeëg doôn.)

En manne?? Die bliêke zich te ergere as de vrouw d’r te lang euver duit òm zich klaor te make. Herkinbaar! Ich zitj dèk al inne auto mèt loupendje moter as ZU nog God-weit-wat aan ’t doon is. En de haor die ZU in ’t douchepötje achterlieëtj kan ouch waal wat vrevel oprope.

Opmerkelik detail in dit òngerzeuk: Hoewaal manslu minder snêl oppe kast zitte, zoje ze sneller ein inj aan de relatie make door klein irritasies dan de dames. 20 % heet waal ins euverwoge òm oetrein te gaon. Acht op de tieën zeet toch mer lever de rotzooi van de angere op te rume dan d’r euver te bliêve mekkere en de relasie op ’t spel te zètte.

Asse zoeëget leust dan geise nateurlik ònmiddelik bekieke of de konklusies oet ’t òngerzeuk ouch opgaon veur dichzelf en diene partner.

Enne? Wae vinje de oetslaâg realisties. Mer bie heur ligge de hoofdaksente toch get anges. Euver ’t algemein zeet ZU zich het meist te ergere aan de slordigheid en ‘t “neet naodinke” van òngergeteikendje.
En angesòm kriegt ICH hinnevêl van ’t getreuzel en ‘t “achter de vodde zitte” door HEUR. Ouch is waor det ZU get ieërder oppe kast zitj. Gelökkig zeen de kest bie os mieër breid dan hoeëg dus kan ze d’r ouch weer gemèkkelik zelf van aaf.

LeiS