(Neet) op vakantie

De vakantietiêd is weer aangebroke. Völ minse gaon d’r op oet; wiêt wèg, kort bie hoês, ein paar daag of ein paar waeke. Meistal aafhankelik van watter inne portemonnee zitj. De vraog: “Woeë gaotj gae op vakantie?” weurtj in dees periode dèk gestèldj. Dao zeen völ minse die neet op vakantie gaon, mer die dao lever neet veur oetkome. Sterker nog, die zich in alle bochte vringe òm mer neet te hove zègge det ze gewoeën thoês bliêve.
“Wae gaon nao Rundhausen” is al ein klassieke smoes. Mer dao zeen d’r nog mieër. In hetzelfdje sträötje ligge: Wae gaon nao “Balkonië”, nao “Costa Balkonia”, of “Playa Balconia”. In plaats van ’t balkon kinse ouch de hoôf d’r biê betrèkke: “Meingarten”, “Tuinesië”, “Costa de Jardin”, en “Gardenia”. Minse die mèt ein staole gezicht zègge det ze ein gegarandeerdj rèngelvriêje vakantie doorbringe in “Saint Souterrain” of “Costa de Grenier” bliêve respectievelik inne Kelder of oppe Zaolder. Thoês dus!


Het “Meer van Hiërnève” zooj in zòn-euvergote oorde kinne ligge mer is ein vin-ke inne buurt. Dae nao “Terrasië” geit keumtj neet vol wiejer dan ’t terras vanne plaatselikke kroeg. Rotterdammers hebbe ’t waal ins euver “Reo” det aan Brazilië duit dinke mer woeëmèt simpel bedoeldj weurtj: Rotterdam En Òmstreke. Groningers plege geregeldj nao “Tailand” te gaon mer ze bedoele ’t Ailand (Schiermonnikoog). St. Houdin-Rhodé (Sint Oedenrode) klinktj ein hieël inj wèg en “Les Montagnes du Ruisseau” is ein aardige verbastering van de Beekse Bergen. Braobenjers zègge waal ins det ze nao “Cuba” gaon. Ze verdoezele det ze gewoeën inne buurt bliêve (Chaam, Ulvenhout, Bavel, Alphen) “Quartier sur Mer” is simpel Wijk aan Zee. De “Canarische Weilanden” vinj ich persuuënlik iets té flauw.
Miêne Bêlzje oeëm haaj as grapje detter nao Montenegro ging. Nateurlik bedoeldje hae neet ‘t landj op de Balkan. mer Zwartberg inne buurt van Genk. In hetzelfdje sträötje liktj de aankondiging: “Wae gaon nao de “Overzeese gebiedsdelen”……. dan geit men ein week-endje nao…Terschelling! Weem aankondigtj: “Ich kampeer al jaore 450 km. bove Pariês”… dae zitj in Roggel oppe camping! “Valdispert” klinktj erg Frans mer is gewoeën ein pilke tege de koppien.
Genògt gekkigheid! Woeë gaon mien vrouw en ich dit jaor op vakantie?? Des neet zoeë meulik. Wae gaon al veur de zevendje kieër op rie nao heur vast plekske oppe camping van Maulwurf. Nog neet zoeë vrieët toeristies en ’t aete en drinke ister good en hieëlemaol neet deur.

LeiS