Lekker

‘Zoeë, ich heb weer lekker gaete”, zagt mien vrouw en sjoof de têlder van zich aaf. Zoeën zin is nateurlik ein kompliment veur de kok.
Mer wat noê eigelik lekker is?? Dao is gein algemein antjwoord op te gaeve.Wat de eine lekker vintj kriegtj emes anges neet door de nak.
Dao zeen aetprodukte die door eine vriê groeëte groep minse neet lekker gevònje waere. Dink (veural bie wichter) aan spruuëtjes. Oesters en kwakkertebille spraeke völ minse aevemîn aan.
Dao is ouch aetwaar die het gros vanne bevolking gemèkkelik binnesjuuft;
friet beveurbieëld, allerleitse soort ‘snacks’ en chinees spul.
Mer wiejer heet ederein zoeë zien eige veurkeure en eigenaardighede asse ’t hebst euver ‘lievelingsaete’. Ich neum get gekke fratse:
– speculaasmupkes tösse 2 sneetjes witte mik
– boterham mèt kieës en ketchup
– boterham mèt jam en hagelslaâg
– boterham mèt paté en kieës
– al ’t aete gepratstj en dao slasaus op
– bastogne-keukskes inne koffie soppe
En asse de MHPZ oet Rooj moogst gluive geit niks bove
– eine hieëring mèt sòkker
– moeërevlaaj
– kerboêt mèt eunjesaus
In alle gevalle geuftj ‘lekker’ aan det get aangenaam, smakelik en prettig is
As aan eme gevraogdj weurt ofter koffie wiltj dan huuërse dèk as antjwoord: ‘Lekker’ in plaats van ‘jao gaer’.
Vreuger neumdje wae de snuikskes diese bie de VIVO enne Végé kreegst ‘babbeltjes’ of ‘lekkerkes’. ’t Wore produkte die ein prettig geveul inne moondj gove òmdet ze euverlepe vanne sòkker. De koster ouch lekker op ‘knappere’ mèt ’t gevaor detter aaf en toe ein stök tândj aafbroôk.
Bie ’t woord ‘lekker’ dinke wae inne ieërste plaats aan aete. Mer ‘lekker’ weurtj in hieël völ anger constructies gebroêktj. Wat te dinke van:
Lekker waerke
Lekker vroumes
Lekker zunke
Lekker geveûl
Lekker op ’t strandj ligge
Lekker werm
Lekker nao de tillevies kieke
Lekker niks doon
Lekker slaope
Lekker keuntje
Lekker geniete

Ich haaj de veurige daag mèt ein naefke van ein jaor of 15 ein pötje gedamdj.
Ich maakdje ein paar blunders en hae wist van mich te winne. Triomfantelik houdje hae mèt zien dam miene lèste stein van ’t bord en zagt toen:
Lekker puuhhh!!