BRANDJWEER

Nieuwe brandweerwagen voor korps Nes - Ameland

BRANDJWEER

Het nut van de brandjweer is al dèk beweze. Dees manne in zwarte pek en mèt degelikke helme op hebbe in völ precair situaties  hulp geboje. Het feit det ze zich verplaatse in eine vètte veurroeëje wage maaktj heur versjiêning zeker nog   imposanter.

                              Neet allein aster vlamme oet ein hoês slaôn mer ouch aster eine auto inne kanaal terecht is gekome of aster gezòchtj mòt waere nao vermisdje persoeëne. Good detter brandjweer is.  Toch vele mich lèst de kloompe oet wie ich zaag en huuërdje det de brandjweer  mèt mer leefst 7 man waas oetgetrochtj toen d’r ein kat in eine hoeëge boum waas gekrope en d’r neet mieër oet dörfdje.

Stèltj uch ‘t tafereel veur: Bie 7 vriewillige brandjweermen die braaf bie de baas aan’t werk zeên geit inins de pieper aaf. Ze laote alles wat ze inne henj hebbe opslaâg valle en sjeze mèt ein rot vaart richting kazerne. De commandant geuftj korte, strikte bevele en dao toertj de auto richting ònheilsplek. Nog net gein sirene aan.                                                                                     De kat, bove in ein smaal populier, kruûptj van sjrik nog ein bitje hoeëger bie ‘t zeen van  âl det gewêldj. De tekskes woeë ze zich angstvallig aan vast klâmptj buige gevaorlik doôr. Mer tege eine hoeëgwirker kan zelfs ein kat neet op en ‘t riejerendj bieëstje weurtj ònger applaus van het noesjierige publiek veilig oppe waereldj trökgezatte.

Veurige waek stòng inne gezèt het volgendje bericht: “Werklieden leveren dief met hoogwerker af bij politie”. Eine mins haaj geprobeerdj eine fiets te staele. De eigenaar betrapdje de deef en vroog aan òmstenjers òm hulp. Twieë wirkluuj die mèt eine hoeëgwirker aan ‘t spoor  bezig wore pakdje de ònverlaot beet en doedje hum in ‘t bekske. Zoeë reje ze mèt hum hoeëg inne locht nao ‘t pliesieburo. De eigenaar vanne fiets reej d’r achter aan en dieë aangifte. De fietsedeef verklaordje naoderhandj detter de rit door de stad vrieët vernederendj haaj gevònje. En det hae half bäökendj en ònger boehh-geroop van ‘t publiek ziêne lijdensweêg aaf haaj mòtte lègge.  Zjuust tegooj!! Zoeë moste ze die nötterikke allemaol roondjrieje. Veural vandale die moedwillig dinger kepot make, die de ambulance tegehaoje en op klaorleechte daâg aoj minse berove.

Dus, bèste kaerels vanne brandjweer, die kat klumtj oppe doôr toch waal vanzelf oet dae boum. Zètj eure kostbare tiêd én hoeëgwirker mer dèkker in tege minse die neet wete wie ze zich mòtte gedrage

LeiS