Aafwasse

Oze vaatwasser (nae des ein lieëlik woôrd) oos aafwasmesjiên haaj os ein jaor of tieën good gedeendj. Mer dao begoste mankemênte aan te kome. De têlders, tasse en kèlles wore nog naât as tink waas oetgesjèdj. Lichelik dieë de druuëg-aafdeiling ’t neet good mieër.
En veurige waek zònnig wie ich nao studio-sport zaat te kieke reep mien vrouw vanoet de keuke:
“Dao keumtj rouk oet ’t aafwasmesjiên!” Ich stòng op oet miene gemèkkelikke zònnig-aovendj-stool en speudje mich nao de plek des onheils. Inderdaad, oet alle reetjes en gaetjes kwaam get stoum-echtigs. ’t Ieërste waat ich dieë waas oppe “oet-knòp” doewe. De moter stopdje d’r innegang mèt mer dao bleef roûk oet tink kome.
Wae hebbe ’t mesjiên leeg gehaaldj en alles mèt de henj aafgewasse.
Sangerdaags mer zoeëne ‘service-monteur’ gebeldj en dae waas tamelik snêl dao.
Òndanks detj nog mer ein joonk menneke waas haaj d’r ’t techniese deil tamelik snel bloeëtgemaaktj en dieë wat maetingskes.
“’t Is te reparere”, waas zien conclusie, “mer dan mòt ich ein noe òngerdeil bestèlle. Det kân waal ein dikke waek dore”.
Wae zoje d’r ins euver dinke… Ein waek sònger aafwasmesjiên; is det te doôn??? Ein alikke waek aafwasse mèt de henj! Trök nao ’t ermzalig aafwasbekske, de aafwasbörstel en de henj vôl reumpels. Des knap neet mieër op te bringe in deze moderne tiêd!!
Mer…’t bleek hieëlemaol geine râmp! Sterker nog…’t waas knap aangenaam! Fijn mèt de henj in ein werm en lekker rûkendj söpke, roondjdreiendje beweginge make mèt de börstel, effe naospeule, ’t Gerei netjes naeve-ein laote aafdruipe oppe aanrèk …En tot de òntdèkking kome det veurâl de glazer weer prachtig bloônke! Wae wore det neet mieër gewindj.
Van ’t ein kwaam ’t anger. En de lèste paar daag is aafwasse ein soort sport gebleke! Én ein meugelikheid òm innegang get alledaagse perikele door te neme.

Noê liktj zoeëwaar ein serieus optie oppe taofel. Wae annulere de bestèlling van ’t moter-òngerdeil, gaeve ’t aafwasmesjiên ane sjötterie (hebbe die ouch nog get) en laote oppe plaats van de wassert wat sjape tummere en ein deurke d’r veûr. Trök nao de simpelheîd. Moste mieër minse doôn!

LeiS