Wae zoje nao ein show gaon van Hans Teewen. Volges miene zoon eine “kei-goje” conferencier. “Det weurtj lache geblaoze”, zagter ane taofel nog. Òngerweges nao ’t theater most ich almer aan det zinke dinke: “Det weurtj lache geblaoze!” Wat heet “blaoze” noê eigelik mèt “lache” te make? De kinst det weurdje net zoeë good wèglaote en dan steiter eigelik precies ’tzelfdje: “Det weurtj lache!”
Miene zoon haaj geliêk; het waas ein gooj veurstèlling; De hieële zaal haaj flink mòtte lache. Sòmmige moste de boêk vasthaoje en de ouge almer druuëgvriêve. Mer sangerdaags kwaam det zinke toch weer bie mich trök. En ich begost nao te dinke of det “blaoze” dèkker gebroêktj weurtj. En jaowaal! As men op ’t puntj steit lekker te gaon aete weurtj waal ins gezagdj: “Det weurtj smulle geblaoze!” Of asse door dikke mist mòst rieje zootse kinne zègge: “Det weurtj oppasse of oetkieke geblaoze”. Mer de kinst neet zègge: “Det weurtj slaope geblaoze!” of: “Det weurtj zitte geblaoze!” Sjienbaar mòtter toch waal get mieër activiteit inzitte. Of get spannendsj.
De oetdrökking keumtj oete militaire waereldj. Dao woorte vreuger völ aktiviteite (die de seldaote moste oetveure) door signale “geblaoze”. Beveurbieëldj op ein klaroen of ein trompet. Dao woort “reveille” geblaoze (tiêd òm op te staon dus) of “appél” geblaoze, as men de mansjappe snêl bie-ein woeëj rope. Tot op hede kinne wae nog de oetdrökking: “De aaftocht blaoze”. Det beteikentj det men d’r gein heil mieër in zuût òm wiejer te vechte want de nederlaag is in zicht. Het is dan wiês òm zich trök te trèkke. Sòms mòt ichzelf ouch nog ins de aaftocht blaoze. As ich weer ins bin blieve hange en ich van HEUR op miene sodemieter krieg. Pas geleje kwaam de oetdrökking waal hieël kort biê. Wae reje braaf laat heivers van ein fieëstje toen wae van wiêt aaf ein zwei-jleecht zoge. Plies! Alcoholcontrole! “Det weurtj blaoze geblaoze”, zagt ZU. Die wist nog det ich almer haaj zitte zeuke nao de beteikenis van al det geblaos en pasdje det perfekt toe oppe situatie.Mèt mer éin pilske op kwaam ich d’r good van aaf en waastj gelökkig gein betale geblaoze.
LeiS