Net wie hieël völ vrouluu heet ZU eine speciale bandj mèt heure kapper. Of baeter, mèt heur kapster, want dao heet nog noeët eine manskaerel aan heur haor gezaete. Jao, ich as echtgenoot nateurlik waal, mer dan waas ‘t mieër òm get te kroele en neet òm d’r de sjieër in te zètte. Vrouwe en kapsters hebbe get mèt deindanger. Vrouwe zoje in paniek rake asse neet òmme drie waeke de salon koste binnestappe. Want de haor zeen heilig. En de kapster zuût in ein vrouw ein gewillig slachtoffer. De vrouw met de sjieër heet ein loesterendj oeër, eine vlotte babbel en weit alles euver de noetste trends, snits, en kleur. Daodoor zeen kapsters groeëtverdeners gewore. Want vrouluu wille namelik altiêd juust détgene woeëmèt moder nateur heur noê nét neet gezèngeldj heet. Welke vrouw is kontent mèt heure nateurlikke haorbos? Gein!
Ich kin bekans gein vrouw die tevreje is euver de kleur van heur haor. Dao speultj ein kapster henjig op in. Ze heet d’r eine dudelikke kiêk op dae wetensjappelik òngerbouwdj is. “Asse ein leechte hoêd hebst dan pèstj ein erg doonkel kleur haor neet. Hebse blauw ouge dan geuftj blònj haor net det bitje extra. En hebse sproête dan steit dao ein rossige kleur prima biê!” Fabeltjes nateurlik, mer de vrouluu trappe d’r allemaol in. De meining van de kapster is 10 kieër mieër waerd dan de neuchtere kiêk van de echtgenoot. Nateurlik speultj ouch ‘t merk verf ein belangrieke rol. De merke mèt ein hieël rits aan biêtendje chemicalieje hebbe de meist fantastiese eigesjappe. De haor blieftj langer op kleur, kinse dèkker wasse, veultj neet plekkerig aan, enz. Dao hingtj nateurlik waal ein neet alledaags priêskaertje aan. Gelökkig kriese bie aansjaf van zoeën aangesmeerdj topprodukt wáál ein stempelke op dien spaarkaart!
As ZU nao ein 2½ oor dorendje was- knip- en verfbeurt heivers keumtj gefietstj bekroêpe mich geveules van verwònjering en kòmpassie. De kinst té good zeên det ze bie de kapper is gewaestj; de geföhndje snit is heur door de kapster dudelik aangekaldj en ze veultj d’r zich, asse ieërlik mòt zeên, zélf ouch neet 100% gelökkig mèt. Mer det zal ze noeëts biêgaeve. Ich bin zoeë wiês òm d’r niks aafkeurensj euver te zègge. En ich zal zeker neet dörve te vraoge wie deur de kapbeurt waâs! Mer det ‘t ein soort van kapitaalvernietiging is, is zeker waor! ‘t Ergste is nog det ZU dit kapper-virus heur hieël laeve mèt zich zal drage.
LeiS