“Paose vreug, Paose laât,
Paose heet de zomer aan zien gaât”
Ein aod versje det lang geleje bedachtj mòt zeen door simpel boreminse die erg aafhankelik wore van ’t waer en daodoor mèt allerlei wiêshede oppe proppe kwome. De beteikenis van dit versje is dudelik: Of Paose noê vreug of laat in ’t jaor vèltj, nao die daag is ’t sjoeën waer neet wiêt mieër wèg. In oze tiêd zeen wae wiêt aafgedwaaldj van de oorspronkelikke beteikenis van Paose. Want vraog de jeugd van alwiel woeë Paose vanaaf keumtj en ze kinne allein mer de sjouwers ophale.
Mien aojers vertèldje mich det op Witte Doonderdig de klokke nao Roeëme vloge en det ze op Paosdaâg weer trök wore. Ze haje dan eikes mètgebrachtj die ze verstopdje tösse de jòng bleumkes. Die eikes wore gekleurdj. Neet in alle kleure vanne rèngelboog zoeëwie noê, mer ein bitje roeëd of broên gemaaktj door ze te verve mèt eunjesjale of roeëdmoos.
Inne noetste versie zeen de klokke vervange door eine Paoshaas. Neet hieël erg logisch, want wat heet eine haas noê mèt eikes te make?Mer goodgeluivig as wichter zeên mòsse heur ’t plezeer en de spanning neet aafpakke en bin ich zelf dèkker inne rol van de paoshaas gekrope. Sònnessmörges verstopdje ich ein aantal gekleurdje eikes achter struûkskes en bleumkes. Dao mochte de wichterkes dan nao gaon zeuke. As ein van heur ein eike haaj gevònje moster det bie mich inlevere. En wae lagte det snel en stiekem weer trök op ein anger plekske. Die jòng niks inne gate en mer renne en zeuke. Bitje flauw van os, det waal. Sòms dieë zich ein vreemdj versjiensel veur. Ich tèldje van teveure de eikes die verstoptj ginge waere. En aan ’t inj van ’t spel loge d’r ein of mieër eikes te weinig in ’t meindje! Ein paar kieër d’n hieële hoof aafgezòchtj, mer niks te vinje. Te good verstoptj!
De daag net veur en net nao Paose stònge en staon noê nog steeds in ’t teiken van…eikes aete. Want dao ligge d’r mieër dan twintjig oppe keuketaofel en ’t is zunj òm die wèg te goeëje. Dus aete tot ze dich de strot oet kome! De commercie heet de lèste jaore toegeslage en noê weurtj ’t woord Paose gekoppeldj aan de meist oeteinloupendje zake.
Paosòntbijt, Paosbrunch, Paoslunch, Paosmêrtj, Paos-meubelshow, Paostoernooi, Paoskleure, Paos-taofellake, Paosbroeëd en Paosborrel.
Ich waer d’r ein bitje Paosmeug van.