Tis januari. Eine noewe start zulle wae zègge. Gooj veurnemes gemaaktj? Heet weinig zin! De meiste valle in ’t water. Want wae wille dèk te völ in eine kieër en griêpe te hoeëg.
Wilse geine kater euverhaoje aan mislökdje veurnemes dan is eine goje raod: Maak allein mer klein veurnemekes. Heb ich ouch gedaon en zal die van mich aan uch veurstèlle:
- Ich pak edere daag eine zuvere zakdook.
- As ich mich gedouchtj heb haal ich zelf de haor oet ’t pötje.
- As ich ein glaeske insjöd zörg ich det ’t beer neet weer euver de randj luiptj.
- ’t Water woeë-in ich de eikes heb gekooktj gooëj ich neet mieër wèg mer gaef ’t veurtaan ane blome.
- Ich zal neet mieër de tandebörstel van mien vrouw gebroêke as ich dae van mich weer ins kwiêt bin.
- Ich zal ’t wc-pepeer veurtaan récht aafsjeure.
- As wae weer nao ein broeleft mòtte zal ich dit jaor minimaal eine kieër veur BOB speule; die anger 10 kieër maag mien vrouw det doon.
- Ich zal miene jas veurtaan ane kapstok hange in plaats van euver eine keukestool te goeëje.
- Ich gaon get minder zaôt op mien gekooktj eike doon.
- Ich zal mien sjoon veurtaan zèlf wikse.
- As ich as lèste nao bèd gaon zal ich alle lampe oet doon.
- Oppe lèste zaoterdig vanne maondj zèt ich ’t aod pepeer veurtaan oppe tiêd ane straot!
- Ich zal de bekindje “dit-is-de-lèste-borrel” neet mieër drinke.
- Ich zal ouch de haarde körstjes vanne mik opaete.
- Ich gaon noê écht oppe kalender zètte wannieër ich weer nao de tandarts mòt.
- Ich zal minder majjenaes oppe friet doon.
- Ich zal de heite sop neet mieër slörpendj opaete mer ieërst effe blaoze.
- Ich zal oppe Maaseikerweêg neet haarder dan 80 rieje.
- Ich zal de autosleutels op ein vaste plaats nieërlègge en neet inne jassetes laote zitte.
- Ich zal mien vrouw helpe ’t bèd opmake (asse dao òm vreugtj)
- Ich haal mien sporttas van noê aaf aan zélf leeg nao de fitnes.
- Ich neem mich veur det ich toch zeker de helft van al dees veurnemes waor gaon make.
LeiS