Völ eikes aete is neet good, want det verhuuëgtj de potentie ònnoemelik. Tis ein veròngerstèlling die al hieël get jaore de rundje duit in ’t arsenaal van volkswiêshede. Ederein duit dao waal ein bitje lacherig euver mer ’t speultj toch stiekem bie völ minse door de kop. Mer wat bliêktj noê oet degelikke òngerzeuke?? Potentie en eikes hebbe niks mèt deindanger te make. Eme dae noeëts eikes itj kan vrieët potênt zeen. Fabeltje dus. De kinst d’r hoeëg-oet wat vervaelendje bròbbele van kriêge.
Nog eine fabel: Asse spinazie itst dae veur de 2e kieër is opgewörmdj, kinse de meist versjrikkelikke zeekdjes oploupe. Want nitraat (of waas ’t noê nitriet?) dae dan vriê keumtj heet fatale gevolge veur dien gezoondjheid! Bie twieë happe te völ likse al naeve diene stool. Mer nog neet zoeë lang geleje heet ein wetensjappelik òngerzeuk oetgeweze det ’t waal mètvèltj mèt ’t gevaor van 2e handsj-spinazie’. Het zooj eventueel mesjien waal ein piepklein risicootje kinne inhaoje asse d’r edere daâg kilo’s van zootst aete. Toen ich dit bericht laâs heb ich ein bitje oetdagendj de middelvinger tege HEUR opgestoke. Zoeë van: ‘Zuse waal, detj allemaol de groeëtste larie is! Heb ich altiêd al gezagdj!’ De bewering det koffie de blooddrök òmhoeëg jeugtj asse mieër dan 3 tasse per daâg consumeerst is hieëlemaol òngeroet gehaaldj. Kloptj niks van!
Minse die d’r verstandj van (meine te) hebbe maakdje pas geleje bekindj det neet vèt, mer sòkker de groeëte boosdoener is as ’t geit òm euvergewicht. En de mòst echt neet dinke desse good bezig bèst asse eine appel itst in plaats van chips. Want ’t fruitzoôr in de Elstar zörgtj d’r veur det ’t glazuur op dien tenj völ sneller aafgebroke weurtj. Wat mòsse noê mèt al die veursjrifte en beweringe die inins neet mieër waor bliêke te zeên?? Dao weurse toch stillekesaan neet tegooj van?! Woeë deense noê eigelik nog raekening mèt te haoje? Ich mòt d´r mich mer neet al te drök euver make. Want dich te zieër opriête is neet good veur dien hert!! Of…geit eine gelieërdje professor dangerdaag bewere det ’t knoer gezoôndj is as diene rikketik aaf en toe eine flinke optater kriegtj!?
LeiS