Eine kieër per waek is ’t in huize kollum-maeker frietdaag. Des al jaore zoeë. Op woonsdig weurtj d’r neet gekoôktj. Dan rietj òngergeteikendje nao de friettent en lieëtj zich dao binne 10 minute eine werme hap klaormake. Friet nateurlik, mer ouch nog get sneks, zoeëwie bami, frikkedel of kroket.
Sòms maaktj Zu zélf friet. Des goodkouper. Mer ’t naodeil is det ’t hieël hoês nao ein keteer bakke vôl hingtj mèt friet-locht en die ister neet zòmmer oet. As de stekker d’r oet is getrochtj zèt ich meistal effe alle deure tege ein ope zoeëdet de windj de geur de boete in kan driêve. ’t Hulptj mer ein bitje.
Friet mèt nog get d’r biê is nateurlik neet ’t allerbèste aete. Mer ’t gemaâk tèltj ouch mèt! Gein voel kèlkes, bekans geine aafwas en snel klaor. Veurige waek reje Zu en ich door het “schone Vlaamse land”. Tege aetestiêd stèldje ich veur òm aan te lègge bie zoeën Belsj “frietekot”. Want ’t waas woonsdig, frietdaâg. Wae zoge eine sjeifgezakdje, òmgeboudje caravan dae örges langs eine hòbbelige weêg geparkeerdj stòng. De walm vloog zoeë door de raam de boete in. De oetbater haaj ein voel spijkerbòks aan, en stòng in zien òngerhumme in ’t vèt te reure. De slòffe aan zien veut wore aan de hak-kantj platgetroje. De bos haor ònger zien erm zaag d’r weelderig oet. Ziene brîl stòng sjeif op zien naas en waas hieëlemaol beslage. Wae dachte allebei ’tzelfdje: “Gauw wèg hiê!” Mer op ein of anger meneer bleef d’r toch get trèkke, want ’t roôk zoeë slecht nog neet. Wae beslote de gok te wage en bestèldje allebei eine friet mèt majjenaes. Dikke friet! In eine rojale, naamloze puntjzak en dao eine klodder van det dik gael spul op. “Asteblief en eet smakelijk” zagt de bakkert. “Da’s dan vijf euro!” Wae lepe trök nao de auto en zatte os oppe zitting mèt alle deure ope. Al nao twieë happe keke Zu en ich deindanger aan en haje allebei dezelfdje gedachte. Dae friet waas….Lekker!!!! Òngeluifelik lekker!!!! Zoeë heet Zu hum thoês noeëts klaor kinne make en alle friettente inne buurt kinne dao same echt neet aan tuppe. Waas det lekkere friet! Wae lekdje os de vinger d’r bie aaf. Toen wae de lèste grummelkes op haje goeëdje ich de tuûtjes in eine ummer naeve de “friettent”. De oetbater vroog: “En…had ’t oe gesmaakt, madam, menieër?” Wae zagte detj vrieët lekker waas. “Dan beveel ik oe aan òm d’r een fleske Jupiler achteraan te drinke” zagter. “D’r is op de hieële wereld niks wat lekkerder is”.
Wae hebbe ziene raod opgevolgdj. Wae gaon dèkker trök!
LeiS