SERVIÊS

Wit mèt greun bleumkes en van alles 12 stöks. Tasse en sjeutelkes, groeëte en klein têlders, platte en depe, groeëte sjaole en klein sjäölkes, sauskòm, soptrien, puddingbekskes, sòkkerpot, melkkenke. Det waas de inventaris van de porseleinkast toen òngergeteikendje in ’t huweliksbuuëtje stapdje.

 

In de loup van de tiêd zeen eigelik allein mer de tasse en de sjeutelkes regelmaotig gebroêktj; anger spul hieël  aaf en toe en dao zeen serviesstökker die noeëts oete kast zeen gekome.                                                                                      Dao zeen d’r ouch ein paar gesneuveldj en de kieëre det det gebeurdje haje veur HEUR get weg van eine râmp en van ieëwig zunj. Gelökkig laâg ’t neet altiêd aan mich aster get oppe plevúze kletterdje.                                                          De gelegenhede det ’t gerei  wáál veur ein groeët deil  oppe taofel kwaam kinse op 3 vingers tèlle. Bie de communie van ein van de jòng, bie de communie en bie de communie.

Woeë de regel vanaaf kwaam desse  van alles 12 (!) stöks most hebbe is neet dudelik. Mesjien det ’t nog stamdje oete tiêd detter groeëte gezinne wore en groeëte femilies. Mesjien ouch det zoeëne good gevöldje porseleinkast toch wat status haaj.

Het woord serviês kinne mien eige wichter knap neet mieër. Die koupe zich asse op kamers zitte bie Blokker 5 tasse veur  3 euro in oeteinloupendje kleure en doon det ‘tzelfdje mèt têlders, kòmme en sjaole. Det zuut ein bitje chaoties oet mer heet ouch waal veurdeile. Aster get kepot vèltj ister eigelik niks ane handj; niks geine râmp. Veur 50 eurocent hebse alweer get noets. Dus hoofse d’r ouch neet zoeë veurzichtig mèt òm te gaon as mèt ’t sjieke serviês en de kinst ins get variëre in kleur en vorm. Want van die ieëwige greun bleumkes weurse oppe door ouch neet tegooj. En ’t bringtj get mieër werk mèt zich mèt. ZU wiltj det serviês namelik neet in ’t aafwasmesjiên! Ze is bang det dan de kleure vaal gaon waere. En dan mòsse as leefhebbendje echtgenoot toch mer weer de aafwasbörstel oet ‘t aanrèkkestje hale.

Euver ’t bestek heb ich ’t nog neet gadj, mer det is eigelik ‘tzelfdje verhaol. De messe, lepels en versjètte van 30 jaor geleje wore van ein degelikheid woeë Uri Geller nog neet ’t kleinste buigingske in zooj hebbe gekrege. Zwaor metaal dus en oerdegelik. Ich heb nog altiêd ’t duuëske woeë ze in hebbe gezaete. Sjoeën, degelik duuëske mèt veur eder mes, versjèt en lepel ein apaart vekske. Ane binnekantj beklèdj mèt ein soort roeëd fluweel. Ane boetekant besjilderdj mèt greun bleumkes.  Grrrr!

LeiS