Ergernisse

 

Edere mins heet waal ein paar dinger woeë hae neet good tege kân, woeë d’r kriegelig van weurtj. Des nateurlik veur ederein versjillendj. Veur mich is det oppe ieërste plaats ein klatsendje deûr! Gewoeën neet te lieje!!

Stèl, dich zitst ein book te laeze, nao de tillevizie te kieke of de steist de was te striêke. Opins huuërse ein deur klatse. ’t Bèste wasse dan kinst doon is drek opstaon en de deur tegooj toedoon. Mèkkelik zat. Mer dan keumtj ‘t. De steist néét drek op inne hoop det det geklats einmalig is en ein vervolg achterwege blieftj. Die gedachte liêktj effe ein gooj te zeen gewaestj en nét asse meinst te konstatere det eine extra loûp nao de betreffendje deur inderdaad neet vandoon waas…klatstj det nondedjuus stök plânk opnoe! ’t Verstenjigste wasse dan kinst doon is asnóg de deur toe gaon doon, mer dan stiktj de waersigheid de kop op. Want wòrròm zooj dien ieërste gedachte mesjien tóch neet de juuste zeen gewaestj…en hebse kans det det geklats vanzelf stoptj.

Dan keumtj ònherroepelik ein anger fenomeen òmme hook kieke:  De geist zitte wáchte oppe volgendje klats! Mer des de duvel verzeuke! Want nét asse dinkst:  Noê zaltj ich waal weer huuêre…gebeurtj d’r niks. En asse vervolges ein bitje achtereuver geist leune…juust! Het kan nóg erger waere asse ein deûr vanne slaopkamer of vanne douche huuërst klatse…bove dus! Dan maaktj ’t feit desse 15 traej de trap op mòst loupe  ‘t gemis aan doortastendjheid  nog get groeëter. Gaon ich tink drék toemake of wacht ich effe aaf? Tis toch mer bove.

Ein 2e ergernis is van eine kantj vergeliêkbaar mer toch ouch weer neet hieëlemaol. Des namelik eine dröppendje kraan! Ouch hiê kinse bie de ieërste tik mer baeter drek nao de kraan loupe en d’r eine kwartslaag aan drei-je.  Veerdig! Mer nae!  Ein dûvelke inne kop zeet det ’t eigelik mer ein klein dröppelke is wat vèltj en ’t biêbehuuërendj tikske huuërse nauweliks. Dus wat zootse mote doon òm d’r ein inj aan te make…? Mer det istj hum noê net! Want wie zaochter ’t tik-geluid is…wie baeter desse d’r op geist lètte ofter nog waal get te dröppe vèltj! En asse dan dus de oeëre spitst….inderdaad, dju de dju!…tik!

Gelökkig heet mien vrouw mich van dees ergernis aafgeholpe. Simpel door d’r op te wiêze desse 2 ummers water verknoeëtst asse eine kraan eine alikke nacht lieëtst doordröppele! Per waek steit det bekans geliêk ane priês van ein fleske Westmalle!

LeiS